زنجيل هديه الى حبيبتي

لأنك بألتزامك مو من أهلك
أخاف تشيل ذنبي مو من أهلك
منو بگدي يحبك مو من أهلك
منو بگدي يحبك من عشرتك
وتمنة يصير اصبع من عشرتك
وانه شكضيت خايب من عشرتك
و اعد بسنين عشرتنة وهي جروح
وأحس ويه النفس يطلع وهج روح
وأخيراً گتلي ودعني وهج روح؟
أروحن وين ماأگدر هوا انت
وانه الماهان من أجلك هونته
الي بدنياي شي واحد هو انت
وحرت بين ان تركته وان تبعتة
انا الونيت والون ون تبعته
ما باعك حبيبك وانت بعتة
حبيبك باع عمره واشترك بي
وحزن گلبة عله حزنك واشترك بي
وبعد شتدوس گلبي واشترك بي
جبل حبه وتگلگل لنتگل بي
ويدنيه شما دفعتي لنتگلبي
واذا تنساه يگلبي لنته گلبي
ولا ريدك بعد وبصدري احملك
وحبيبي شلون ترضى بصد رحم لك
اذا حملك يتعبك بصدري احملك
الي وروحي الأرض وشگد دولها
وتداوي الداء لو بالمخ دوه لها
بس العين ما يحصل دوه لها
دواها العين خلها من تقر بي
وتصب كلما تشوفك منته قربي
ولك شيصير حبك من تقر بي
وتحبني انت يقين بصدري مو شك
الف شوكة سكوت بصدري مو شك
انذبح گلبي وتشضه بصد رموشك
وعرف محد يدفنه وشي دفن شي
وعگب صدر المواگد شي دفن شي
كفر من رسم غيرك شي دفنشي
وأظن للجنة يدخل من يرسمك
وحبيبك يمسح اسمه من يره اسمك
بسمك حبي جمالك من يه رسمك
وانه الليل بعيونك شفتة كحله
وشفت شمس الأصيل وشفتك أحله
العسل من ضگته كلك شفتك أحله
اذا ً لو من شفاهك بستك أشفه
اذا انت المات يعدل بس تكشفة
شتظن حبك يضعفك بس تكشفة؟
وعلي تخفي اهتمامك واكتراثك
وانه المن مات گلبي وك تراثك
نسيت الحب الأول؟ وك تراثك
صدگ ينسه تراثه هسه جيلك؟
وتشوف زواج عيني هالسجي لك
وانادي وما تگلي هسه جيلك
صحتلك يا وصارت كبر ياءي
واذا رائيت بالشط كب ريائي
حبيبي شلون تجرح كبريائي
وتذلني گبال كل ناسك وناسي
وبقيت بصحرا شاتلي وناسي
ناس تگول لا تسكت وناسي
لأن كلش مذلتي لاگتلهم
وجبل حبي المقدس لاگه تلهم
گالو حيل ذلك..لا گتلهم
عنايه حتاج گلبه وجاي اعاني
وخفيت شكثر منك جاي أعاني
تمرمرني من ازورك جايع آني؟
شكثر ندمان جي بيتك عتبته
وعرفني الباب من دگتي وعتبتة
عتابي وياك جي حبك عتبتة
گلبي شلون يمهم وك كسرتة
أسير وذل شجالك وك اسرتة
گبل جانت اسرتك وك اسرتة
اسرتك هسه سمتني الضحيه

تحياتي شاعر المنتدى