اوكف يا زمن عندي عتاب وياك

اوكف يا زمن عدنه عتاب وياك

تعال وشوف جرحك بيش ملچوم

خليت المصيبة بگلب كل انسان

ويابيت التطبله تشوفه مهموم

عاشرنه الحزن من چنه بالكاروك

ولحد ما كبرنه ويانه مظموم

البشر بالعيد تفرح تلبس اشكال

واحنه من الدمع فصلنه الهدوم

العيد إنذِبَح والضحِك دمه يسيل

ومجهول الهوية الفرح هاليوم

تعودنه بعد عالقهر والحسرات

وتعلمنه الحزن مو خوش تعلوم

نعيش بنص وحوش وناس تاكل ناس

وضمير اكثر العالم صار معدوم

صار الضحك سلعة وتشتريها الناس

وثمن كل ابتسامة بكاس مسموم

طبعاً القصيده بقلمي المتواضع تحياتي

تحية لك ايها الشاعر
قصيدة جميلة
زدنا بالله من روائعك

شكراً للمرور حبيبي الغالي ان شاء الله يوصلكم كل جديد

عاشت ايدك